呢一日....決定了我一生~~ 哈哈....今日同呂大人和他媽咪(未來奶奶)去左婚紗展, 本來一心諗住係拎D 資料同格價, 但係半推半就.....咁就成事了.....哈哈
事源係, 我同呂大人諗住去煌府個檔口問D 資料, 因為我之前已經去過都會煌府睇過...我都幾鐘意, 又知佢九龍灣又會有個新場, 所以都有d 心思思, 問多d 資料先, 去到個檔口, D SALES 係咁叫我地坐低先, 我地開頭都唔肯坐, 怕一坐低就走唔甩...點知未來奶奶話好累..想坐下, 咁無計啦...一坐低我地已經講左我地未揀日子, 佢地就話唔梗要啦, 我地有"吳剛師傅" o係度....(真係食炭o個個...呵呵), 吳剛師傅會幫我地揀個好日子ga.. 免費的....最後吳剛師傅都幫我地揀左日子, 而o個日好日子, 九展個場仲未有人book, 我就更加心思思, 但係又擔心wor, 因為話晒都係買樓花, 仲裝修緊...所以都係心大心細, 不過佢地又好有誠意....又實牙實齒咁話無問題, 所以我地就比左二千蚊hold 住個場先, 等我返去同我媽咪&老豆傾左計先.....返到屋企, 叫呂大人開口同我父母講, 佢地都無問題~~~呼.....鬆一口氣
點知過左幾日...有d 麻煩事開始出黎啦......係咩?? 咪就係未來奶奶開始聽到d 師奶朋友不同o既議見, 又話貴, 又話其他酒樓送好多野, 又話九展唔就腳, .....等等等等.....呢d 問題真係煩到人都癲呀......
結婚真係唔係二個人o既事呀~~~~
我之前想得太簡單了.....
我向大家宣佈 我同呂大人將於
2011 年1 月 23 日
結婚啦~~~ 我地一齊向123 進發!!
** 希望唔會改日子啦, 如有更改我會即刻通知大家.....大家請祝福我 **
